【明報專訊】喺旅遊業界打滾咗50年嘅譚光舜（圖）上月接任旅議會主席，佢噚日與傳媒茶敘時同Emily講，佢見證業界起跌，舉例SARS同亞洲金融風暴時期唔少港人到內地設廠，業界從中得益唔少，當時有廠家返港搵旅行社安排4人遊日團，問到預算時個廠家話「廿萬元以內唔使話我知，（金額）你自己填啦」！惟之後新冠疫情重擊業界，故佢對業界及議會充滿感情，「想為業界同香港做吓嘢」。

憶SARS期間「好景」

蛇年將至，譚光舜對訪港內地團量有信心，但預測出境團數字唔太理想，原因包括聖誕及新春相隔太近、長途航空運力仍未恢復等。佢提到疫後業界人手不足，好多人唔願意返番呢行，現只有約萬六個導遊同領隊，比2018年少三成；而議會會主動出擊，短期可透過輸勞補充人力，中長期就到各大專院校同中學講解行業前景同提供實習機會，吸引新人入行。

服務旅議會廿幾年嘅譚光舜曾任秘書、司庫同副主席，佢話未來工作方向包括推動行業發展同專業化、促進會員權益同福利、協助業界拓展商機等，目標令業界「再次發光發亮、再創高峰」。佢提到議會將繼續推動深度遊，向政府爭取開放更多歷史文化景點，包括正爭取開放油麻地警署。