【明報專訊】善導會自10年前舉辦「恒生青年前路探索計劃」，協助16至30歲弱勢青年劃規職涯發展。參加者家偉舊年參加計劃，佢形容當時嘅自己喺工作上迷失方向，參加計劃後接觸唔同行業，其中一次聽完殯儀禮儀師嘅分享，令佢回想爸爸離世時，喺籌備喪禮過程嘅無助同痛苦，最終經計劃穿針引線入行，搵到自己嘅事業方向。

另一參加者阿諾曾因事入獄，出獄後透過計劃獲得創業培訓及一筆起動資金，之後成立工作室，投入紋身行業。佢話唔少上一輩覺得紋身係黑社會嘅象徵，但佢覺得紋身係一種藝術、生活態度及表述自己嘅方法，希望大眾對紋身有新見解，而佢透過紋身去過唔同國家交流，見識世界之大。

善導會話呢項計劃過去10年有2200人受惠，批出127個創業資助項目，而近年批出嘅多以個人興趣及專長發展為業務，包括點心教學、音樂製作、藝術教育、陶瓷手工藝品等。計劃由恒生銀行贊助，恒生銀行企業傳訊及社區投資總監羅淑雯話，恒生提供嘅支持唔止資金，仲有專業知識分享及人脈網絡聯繫。