【明報專訊】唔少議員趁聖誕長假外遊。實政圓桌立法會議員田北辰噚日喺facebook話去咗日本「充電」，有好多深刻體會，例如去咗一間特色相撲體驗餐廳食晏，除咗可以睇相撲手比賽，更可以即席上場較量。

田二少話呢間餐廳要預早成個月訂位，全場只有十零張枱，餐廳負責人會詳細講解相撲歷史同規則，客人可以欣賞相撲手比賽，不過「戲肉」係會邀請每枱客人上陣。

讚以客為本 全程冇hea做

佢話自己應孫女要求頂硬上，著住由餐廳提供、有厚護墊嘅相撲手衫，但對手有115公斤重，結果出盡九牛二虎之力咁推，對手好似座山咁郁都唔郁，之後退後幾步再助跑衝埋去都係咁……最終佢唯有跳出圈外投降。

田二少讚呢間餐廳服務以客人為本，全程無絲毫敷衍或煩厭，令佢發現香港要吸引旅客缺乏咗樣嘢，就係真正娛樂、努力經營同對客人真心付出，而唔係單純打卡旅遊，值得香港餐飲業參考，做多啲特色體驗同餐飲，持續做到好口碑就唔怕被人抄！

江玉歡遊澳門 喜新舊互補

議員江玉歡噚日去澳門睇網球賽，話賽事配合假期舉行，吸引最多遊客。佢話鍾意澳門新舊互補，又喺假期同周末推出唔少演唱會同活動，對遊客嚟講，喺一兩日內行街、食嘢同睇show，係唔錯嘅組合。