【明報專訊】聽日聖誕節，個人資料私隱專員公署嘅關愛義工隊趁住節日去到聖雅各福群會灣仔長者地區中心，為約200名長者舉行聖誕防騙聚會，送上禮物包，仲請咗藝人陸浩明主持問答同抽獎環節，又同一班長者大合唱，提早過聖誕。

私隱專員鍾麗玲就負責講解防騙資訊，提醒一班「老友記」提高警覺，首先係提醒長者提供個人資料前應「停一停、諗一諗」，唔好隨便披露個人資料、點擊或掃描可疑超連結及二維碼，或登入任何可疑網站。

專員亦講解近期嘅騙徒手法，包括以人工智能深度偽造（deepfake）技術「改頭換面」，假冒受害人親友呃錢，或者呃走受害人個人資料。鍾麗玲仲提醒長者，減少喺網上分享拍攝到正面嘅相片或影片，而即使來電者用視像通話，甚至講得出佢哋嘅個人資料，有懷疑都應以其他聯絡方式核實對方身分。