【明報專訊】臨近聖誕，發展局長甯漢豪舉行義工分享會，同發展局轄下9個部門嘅義工隊代表見面（圖），並邀請佢哋分享義工活動嘅點滴。

土木署擬3D打印聖誕禮物

有部門已經計劃好聖誕點樣送暖，同時有參與義工服務廿載嘅退休員工分享當年義工經歷。土木署高級技術主任包家威就透露，有同事以3D（三維）打印製作咗過百份小禮物，打算聖誕節送畀長者用嚟鍛煉手部肌肉。

建築署退休文書主任巫燕玲分享喺2003年首次參加家居維修服務嘅經歷，佢話當時一眾義工用咗兩日為長者翻新住所，最感動係翻新之後長者好開心，仲捉住佢隻手話義工翻新家居「好過請我食一個禮拜嘅飯」。

渠務署成立嘅攝影義工隊就同非政府機構合作，製作為吞嚥困難照顧者而設嘅手冊。渠務署工程師李澤祖難忘每次拍攝時長者都會盛裝出席，佢話拍攝同打印相片對義工嚟講好簡單，但長者會好感恩。