【明報專訊】政府近排成日講「無處不旅遊」，𠵱家連沙灘都會做「打卡點」。噚日旅遊界議員姚柏良書面質詢，關注康文署轄下42個公眾泳灘目前只能滿足最基本嘅康樂需要，機構好難申請嚟辦活動同盛事。康文署回覆話，為咗進一步提升泳灘服務同吸引力，將會喺合適泳灘設置「打卡位」，畀泳客同旅客影相留念。

姚柏良關注泳灘嘅商業用途同舉辦非指定用途活動嘅情况，康文署回覆，2023年至今年11月共批出55個非指定用途活動嘅申請，包括沙灘嘉年華、音樂會、堆沙比賽、粵劇比賽等，商業用途就以批出小食亭等為主。

姚柏良其後喺facebook話，淺水灣、石澳、赤柱等地都係知名旅遊景點，但泳灘體驗單一，又無乜商業元素，只佔泳灘面積1%至3%，舉例石澳只有小食食肆，赤柱正灘都係得個快餐亭，希望局方進一步構思豐富泳灘，打造更多嘅消費場景，提供更多元嘅活動體驗，方便各界喺泳灘舉辦文體盛事。