【Emily】無人機×煙火×熊貓 下周六西九匯演
文章日期:2024年12月19日

【明報專訊】早前「PANDA GO!香港遊」喺本港各地展出2500隻熊貓雕塑,將於下禮拜六(28日)舉行首階段展覽嘅閉幕活動。當晚8時15分,主辦方將喺西九文化區舉行熊貓主題煙火無人機匯演,屆時會出動1000架無人機,結合煙火嚟表演,市民可以喺西九文化區嘅藝術公園觀賞。

主辦方話,今次匯演係香港首次使用無人機搭載煙火,因為無人機可以飛行唔同軌迹,亦可以靜止喺空中,只識墜落嘅煙火因此可以有更多唔同效果。

今次匯演大約歷時10分鐘,合共有7幕,當有3幕涉及使用無人機搭載煙火,持續20至50秒不等,其中第三、第七幕會用瀑布型煙火效果,第六幕就會應用閃爍型煙火效果。

演出首幕開頭會有熊貓倒數,第三幕將有3D立體熊貓伴煙火登場,第四、五幕屬於香港專屬IP《熊貓香港親友會》,第六幕「熊貓遊香港」就會有半立體嘅香港景點出現,第七幕會由「PANDA GO!香港遊」標誌伴隨不同熊貓嘅出現作為結尾。

之前有大型無人機表演信號問題取消,今次主辦方就表明,匯演會視乎天氣而隨時變更,如果因天氣問題而要取消,將會喺當日晏晝4時公布。