【明報專訊】工展會噚日踏入第四日，民建聯一眾成員去咗捧場，同參展商及市民交流，仲忍唔住又食又買。議員顏汶羽試咗烤全羊，大讚好味，又買咗幾大袋零食返去同兩個仔分享。

民建聯主席陳克勤、副主席周浩鼎同葛珮帆、秘書長葉傲冬等人，噚日由廠商會會長盧金榮等人陪同行工展會，買咗罐頭鮑魚等產品，仲喺「美食廣場」試食烤羊，又了解咗寧夏枸杞產品等。

顏汶羽喺facebook話噚日閒日下晝場內已經迫到水泄不通，反映今年工展會人氣好旺，又話無論係日常用品定特色美食嘅攤位都大排長龍。佢話有幾個觀塘工商聯朋友擺檔，自己特別過去幫襯，支持本土品牌。