【明報專訊】香港第一張航空相係英國皇家海軍飛機影嘅，今年係張相出現第100周年。土力工程處噚日宣布斥資650萬元研發嘅「數碼航空照片解讀系統」月底正式使用，到時可以將傳統紙本航空相轉成三維數碼數據同影像，建立三維數碼模型，提升斜坡安全管理同土地規劃工作成效。呢套系統暫時只有政府部門同參與政府工程嘅人先用得。

7萬張已入系統 利分析山泥傾瀉

土力工程處副處長（規劃及測試）楊暉話，航空相可以幫工程人員做好多嘢，例如繪畫地質岩土圖、編製人造斜坡紀錄冊等，以前人員要親身去航空照片圖書館借嚟睇，之後仲要用儀器放大張相慢慢解讀。新系統使用後，人員可以喺網上搜尋同下載航空相，然後用軟件轉換成三維數碼模型，除慳咗借相嘅時間，仲可以畀幾個用戶一齊睇同一組相，提高做數據測量同繪製參考圖嘅效率。

𠵱家土力處收藏咗超過37萬張航空相，已將約7萬張輸入系統，啲相嘅年份去到1963年，主要係雨量較多或者曾發生山泥傾瀉嘅年份，方便分析山泥傾瀉風險；未來會視乎系統運作再決定下一階段幾時開始，將更多相放入系統。