【明報專訊】電影《九龍城寨之圍城》展覽由香港機場移師到啟德AIRSIDE，展期由噚日起到出年4月13日。展覽展示咗電影場景，包括後巷、髮廊、冰室等，並融入埋電影嘅環境聲效同演員對白，包括飛機聲同斬叉燒聲。今次展覽仲新增5個打卡位，參照當年城寨實物整咗漫畫攤、裁縫店、跌打舖、鞋匠店同牙醫診所，不同場景亦隱藏咗多個電影彩蛋，例如演員戲服同微縮模型。

同場有餐飲同零售攤位，包括涼茶舖、懷舊大牌檔同士多，另有發售電影主題精品。出席展覽開幕禮嘅副財政司長黃偉綸食咗碗招牌叉燒飯，大讚美味。黃偉綸致辭時話，康文署同文創產業發展處籌備緊另一個圍繞《九龍城寨》嘅展覽，將喺九龍寨城公園舉辦，預料明年3至4月推出，詳情稍後公布。佢又話，有人曾經擔心香港電影嘅前路，但近兩年香港有3套電影本地票房破一億元，相信香港電影業大有前途。