【明報專訊】立法會選舉預料出年年底舉行，噚日有報道稱前民政事務局長、香港酒店業主聯會執行總幹事徐英偉（圖）有意參選，挑戰現任旅遊界議員中旅社副董事長姚柏良。不過，徐英偉噚日朝早喺自己有份主持嘅now新聞台《時事全方位》回應話：「佢（姚柏良）係我唯一支持嘅立法會議員，我係唔會參選立法會嘅。」

退黨另有原因 公職同朋友揀後者

徐英偉今年8月去信民建聯申請退黨，噚日有報道引述消息，話徐英偉嘗試爭取民建聯支持佢參選，但黨內一直猶豫不決，令佢萌生退黨念頭。徐英偉噚日澄清，退黨係有其他原因，但就唔多解釋，仲話如果自己做過錯事，勇於承認係應該嘅，其他人有無做、做咗咩就由佢哋自己處理，「如果要我選擇公職同朋友，我一定選擇朋友」。

徐英偉又話，最近有好多傳聞，而對佢而言「多朋友」好緊要，又提到同姚柏良合作得好好，「無論私底下，容許我公開講，佢都係我唯一支持嘅立法會議員」，唔希望有謠言影響佢同立法會議員，尤其係姚柏良等好好嘅朋友合作。