【明報專訊】新任文體旅局長羅淑佩（上圓圖）同運物局長陳美寶（下圓圖）噚日首次以局長身分出席立法會大會，分別回應議員嘅口頭質詢。羅淑佩會後同Emily講，「原來答口頭質詢係好緊張」，自言回應時愈讀愈快，相信下次時間掌握會有進步。

兩名新科局長噚日首次出席大會，Emily見佢哋回應議員質詢時神態自若，亦未見「蝦碌」。其中羅淑佩就發展地區旅遊業嘅質詢，預告「發展旅遊熱點工作組」將喺明年上半年制訂推進嘅項目，另提到當局將結合鯉魚門海濱、鄉村風貌同海鮮美食制定特色旅遊路線。官員就口頭質詢作主體回應有大約7分鐘時限，羅淑佩會後話好緊張，「因為我讀嗰時，後面愈讀愈快」，認為時間掌握十分重要，不過話議員都好包容，希望下次做得更好。

至於陳美寶就回應有關構建「綠色船用燃料加注中心」嘅質詢，佢會後同Emily講，十分重視與立法會交流同互動，口頭質詢可以直接聆聽議員意見，希望日後繼續同議員保持良好溝通。