​​【明報專訊】投資推廣署噚日宣布，來自菲律賓並創立建明集團嘅許氏家族，將喺香港成立家族辦公室。Emily翻查資料，發現許氏家族其中一名成員，建明集團董事長許明良活躍商界，仲曾於棉蘭老島捐錢建成一座戒毒中心支持禁毒，並有份就2010年馬尼拉人質事件推動菲律賓「民間賠償」，協助解決事件，因此在2018年獲菲律賓時任總統杜特爾特頒發拉普拉普總統金質勳章，表揚佢喺上述兩事嘅貢獻。

推廣署話，建明集團業務主要涵蓋天然資源供應、船運業務、房地產建設、高端精品零售、投資管理五大範疇，該集團於1983年由許氏家族創立，喺中國大陸、東南亞地區累積逾40年多元化投資經驗，成為早期喺海外投資嘅華僑企業之一。集團執行副總裁霍展邦話，許氏家族在港設家族辦公室係響應港府推動家族辦公室嘅發展，同對香港作為國際金融中心嘅堅定信心。

翻查立法會文件，政府7月時話香港有89間家族辦公室，其中72間來自內地，其餘來自東盟、歐洲等地。投資推廣署家族辦公室環球總裁方展光話，許氏家族設家族辦印證香港喺全球金融生態系統中嘅重要地位，相信會吸引更多國際資本。