【明報專訊】近年公務員流失，公務員事務局亦推出措施「吸人才」，特別係年輕人，舉例提早聘請大學三年級本科生、全年招聘一般職系空缺等。局方噚日向立法會提交文件，話政府舊年10月設立招聘中心，全年招聘助理文書主任、文書助理及二級私人秘書，截至今年11月15日，3個職位共收到41,600份申請，較2022年未開始全年招聘時增加25%。

逾60大學生「提早」獲聘

至於提早聘大學生方面，公務員局個別職位，自舊年起擴闊招聘範圍至下一屆畢業嘅大學本科生和研究生，以四年制學士學位課程計，即係提早招聘大學三年級生，畢業後可隨即加入政府工作，局方話至今有超過60人「提早」獲聘。

相關部門亦會提早接觸獲聘大學生，以增加佢哋對職系嘅歸屬感，例如行政主任職系會安排佢哋參與今年首辦嘅職前實習計劃，為期半年。公務員事務局話，過去幾年積極舉辦及參與唔少招聘活動，好似每年都會參與由貿發局喺1月舉辦嘅「教育及職業博覽」，今年就特別喺展區內舉行共20場「認識公務員職系」講座，10月又參與平機會同香港族裔共融聯會舉辦嘅招聘會。