【明報專訊】現屆政府大力發展基層醫療（Primary Healthcare），鼓勵多做健康預防，立法會一個委員會噚日討論長者醫療需要，議員謝偉俊唔知係咪搞錯咗基層醫療概念，以為係講針對基層市民服務，質疑政府忽視中產家庭。佢以近期大熱港產片《破．地獄》為例，話主角許冠文好彩可以喺屋企離世，仲有孝順女照顧，但近年好多中產家庭移民，留低長者孤單過活，或有年輕人「唔懂事」而坐監，令唔少家庭面對好大壓力，促請政府制定政策可以更到肉地支援。