【明報專訊】市建局行政總監韋志成噚日喺網誌上話，為配合「喜迎大熊貓」嘅氣氛，將於觀塘市中心嘅「自由空間」放置80隻身高0.5米至3米嘅大熊貓裝置，本月6日起開放畀市民及遊客參觀「打卡」。局方又話，現時開放畀政府部門和地區團體舉辦活動嘅「自由空間」，至今累計吸引超過100萬人次到訪。

其中，兩隻1.5米高嘅大熊貓會化身為工業風嘅機械熊貓，及代表多元宇宙嘅太空人熊貓，話係要展現觀塘市中心由昔日嘅傳統工業區「蛻變」成觀塘市中心2.0。

花墟將辦聖誕工作坊

市建局早前喺中環搞「城蹤遊」活動，向市民介紹中區特色及保育項目；喺旺角洗衣街與花墟道都將有重建項目，局方話想將「城蹤遊」活動嘅成功經驗應用到花墟，會於本月中旬於花墟舉辦「萬花同慶」活動，喺聖誕節前嘅周末與花墟部分商戶、地區團體合作，以花為題材舉辦工作坊，與市民遊客歡度佳節。