【明報專訊】經民聯立法會選委界別議員陸瀚民（Benson）係跑得之人，佢噚日同太太洪綺敏參加上海馬拉松全馬賽事。「上馬」有一個其他長跑少有嘅特色，就係起步前現場奏唱國歌，跑手嚴肅高唱。大家可能記得，香港之前有賽會辦比賽發生廁所不足問題，Benson賽後話香港搞大型賽事可以借鏡，例如喺上馬，起步點嘅流動廁陣成條街咁長，話目測跑手基本上只需要輪候一兩分鐘。

終站設放鬆區冷水池

該賽事受關注，因為10月上馬正式成為中國唯一雅培世界馬拉松大滿貫嘅候選賽事，今年有近3.8萬名跑手參加唔同級別嘅比賽。Benson就話，賽會喺物流同人流管理方面做得貼心，話起步時間朝早7點，當地安排多架上蓋開合式貨櫃大卡車畀跑手寄存行李；大會除咗設醫療站，沿途有唔少義工攜手提AED機應急。佢又話終站設於上海體育館，空間十足，現場有放鬆區，提供物理治療按摩服務，亦有冷水池，畀跑手浸腳放鬆肌肉。

Benson最讚賞嘅係，賽事下晝1點結束，大會喺3點已將選手照片上載到選手App，話「跑界常說，可以冇獎不過唔可以冇相」，佢話噚日角色係幫太太「破風」，自己成績係4:44:19，太太比佢早大約9秒衝線。