【明報專訊】最近天清氣朗、藍天白雲，前日好多人喺天空見到好大嘅「交叉雲」，天文台小編噚日出帖，好搞笑話「唔通個天都唔鍾意我？」小編跟住解釋，呢個唔係咩上天啟示，其實係飛機留低嘅「足迹」。原來當飛機引擎噴出嘅熱氣流遇上高空嘅冷空氣，水氣會冷卻凝結成小水滴或冰晶，就會形成一條條凝結尾迹，亦即係大家所熟悉嘅飛機雲；而喺眾多航線喺空中縱橫交錯，就會形成十字等唔同圖案，共同創造出獨一無二嘅空中畫作喇。

天文台之後仲好似阿媽咁長氣，話下周初至中期氣溫會逐漸回升，但預料另一股東北季候風會喺下周後期抵達華南沿岸，天氣將再次轉涼，叫大家千祈唔好鬆懈保暖呀！