【明報專訊】香港喺新冠疫後頻頻搞峰會，同世界恢復Connect。噚日香港全球青年專業倡導行動，就喺香港海事博物館舉辦咗2024全球青年力量峰會，吸引嚟自30個國家嘅過百名青年專業人士親臨，逾千觀眾線上參與。峰會仲邀請咗副政務司長卓永興致辭，特首李家超亦都致函祝賀。

李家超話，今次峰會以「賦能專業人士，推動全球倡議：來自香港的聲音」為主題，係個不可多得嘅機會，畀嚟自大灣區、東南亞及中東嘅青年專業人士匯聚一堂交流，為香港同全球嘅發展注入新動力。與會嘉賓仲包括團結香港基金主席陳智思、蘭桂坊集團主席盛智文、匯豐亞太區聯席行政總裁廖宜建等。

主辦今次全球青年峰會嘅香港全球青年專業倡導行動，其創始召集人劉仲恒醫生係財經事務及庫務局前局長馬時亨嘅女婿。劉仲恒話，2024全球青年力量峰會係一個重要嘅催化劑，推動跨越地域同行業界限嘅行動與合作。