【明報專訊】繼多名議員收到疑似合成牀照嘅勒索電郵後，再有議員成為詐騙目標。勞聯兼勞工界議員周小松同Emily講，有勞聯分會理事長周二（26日）接獲自稱係佢本人嘅來電，話「我係周小松」，但唔係以佢電話號碼致電。騙徒翌日WhatsApp發短訊訛稱有急事借錢，要求理事長轉帳近5萬元，仲約佢去立法會天橋，話之後喺辦公室還錢。理事長轉帳後打畀小松求證先知受騙。

約去立會天橋 似熟議會運作

警方回覆話紅磡警署周三下午接到男子報案懷疑受騙，向對方轉帳4.8萬元，案件列作「以欺騙手段取得財產」，由九龍城警區刑事調查隊跟進，暫未有人被捕。據了解，案件懷疑用咗「猜猜我是誰」手法詐騙，暫無迹象顯示同人工智能詐騙相關。

小松認為，疑犯熟悉立法會運作，所以約理事長喺當日立法會大會前見面，令對方信以為真。佢建議市民提高警覺，即使朋友要求轉帳，最好先致電對方求證，免招損失。

警方今年首10個月接獲7192宗電騙，較去年同期2717宗升逾1.6倍；損失額由去年首10個月約8.34億元，升逾1.9倍至今年同期24.41億元。