【明報專訊】政府要說好香港故事，有議員噚日喺立法會大會口頭質詢，關注政府會唔會加強大專院校外語培訓。新民黨主席葉劉淑儀發言時大嘆，學外語真係易學難精，仲分享自己學過法文、日文，但𠵱家日文水平「連菜單都唔識睇」。

倡資助有意闖中東市場者去當地學習

葉劉淑儀話，十幾年前考過GCE O-level法文，𠵱家淨係識睇菜單，當年去美國讀書時都讀咗3年日文，包括修讀沉浸式日語課程，但𠵱家連菜單都唔識睇。

葉劉淑儀認為，學完外語要精通到識用，單單喺大學主修、副修甚至去海外交流都唔夠，建議教育局增設基金，資助有意進攻中東市場嘅人，去當地學習阿拉伯語同文化。

本身係嶺南大學協理副校長嘅議員劉智鵬都話，外語唔係「學就會識得用」，𠵱家大學外語課程無法令學生做到應用嘅水平，建議教資會增撥資源鼓勵大學開設阿拉伯語同俄語課程。

署理教育局長施俊輝回應話，8間資助大學近年提供12種外語課程，包括阿拉伯語同俄語，但認同可以研究增撥資源畀院校，增加交流機會，畀同學去當地學習阿拉伯文化。