【明報專訊】人口老化，吞嚥困難患者愈來愈多，「照護食」市場亦愈做愈大。噚日喺樂齡科技博覽上，警隊前「一哥」李明逵即席示範煮出一味番茄魚柳，屬容易咀嚼嘅餐膳，色香味全，同場嘅演員修哥（胡楓）試食後大讚「好好食」，仲食到唔停口。

李明逵退休多年，仍孜孜不倦研習廚藝，曾跟烹飪能手梁許安璞學藝。李明逵話通過今次示範，最希望畀吞嚥困難者能夠享受食物，因為佢哋飲食辛苦，如果煮到一啲容易食又好味嘅食物，尤其係同家人一齊食，係一件好開心嘅事。佢仲解釋，番茄魚柳屬於IDDSI七級（即係容易咀嚼），有咬口，濃度適中，一般人都啱食。所謂「容易咀嚼餐膳」唔係軟餐，適合牙力較弱（例如牙痛）嘅人食。

噚日社聯同香港防癌會亦攜手發布《照護食——家居篇：吞嚥困難患者照顧者全面手冊》，除咗介紹膳餐，亦為吞嚥困難者設計菜譜同改善吞嚥能力嘅運動訓練，會免費派發，同時可通過二維碼畀讀者即時連接至機構「照護食」網站。