【明報專訊】康文署2019年起推出試驗計劃，開放轄下6個體育館主場畀市民預訂玩新興運動，例如閃避球、躲避盤、健球等。睇番日前黃大仙區議會嘅文件，康文署計劃喺下年第一季將額外6間體育館納入計劃，包括黃大仙區竹園體育館主場。Emily問過康文署，佢哋話試驗計劃市民反應正面，所以計劃開放更多合適嘅體育館主場，新增嘅6個分別位於東區、黃大仙、油尖旺、離島、西貢同沙田，署方正陸續諮詢相關區議會，並適時檢討擴展計劃成效。

預訂擴至繁忙時段

早前試驗計劃畀市民透過「康體通」電腦預訂系統，以個人名義同先到先得方式，預訂7日內非繁忙時段嘅赤柱體育館、長沙灣體育館、鯉魚門體育館、長發體育館、富亨體育館及朗屏體育主場設施玩新興運動。康文署話會將試驗計劃下共12個體育館主場可供預訂嘅時段推展至繁忙時段，即周一至五下午6點或之後，以及周六、周日同公眾假期嘅全部時間。