【明報專訊】澳門特首賀一誠噚日宣布，明年繼續向市民派錢，每個澳門永久居民派1萬元（澳門幣，下同），非永久居民就有6000元。呢次係澳門政府自2008年起連續第18年向市民派錢，計番轉頭，已經總共向每個永久居民派咗超過14萬元。如果以澳門今年第三季收入中位數1.8萬元計算，17年嚟相等於派咗接近8個月花紅。

賀一誠噚日到澳門立法會總結今年政府工作同公布明年財政預算，提到現時澳門嘅財政儲備有6000幾億元，外匯儲備就有超過2300億元。

賀一誠喺今年8月發稿，話因健康理由唔尋求連任，又話自己年紀大喇。噚日佢就提到上任後要面對3年疫情，壓力好大，每日瞓得3至4個鐘，搞到好攰，唔參選連任係負責任嘅決定。澳門政府下月底換屆，由澳門終審法院前院長岑浩輝接任特首。