【明報專訊】立法會噚日舉行「三捐」（捐血、捐骨髓和捐器官）推廣活動，出席活動嘅醫衛局長盧寵茂話，所有香港市民都係「三捐」受益者，因為每個人都可能會病，並引述港澳辦主任夏寶龍話，希望大家唔止做「一個旁觀者、一個評論員」，應該做「參與者」同「貢獻者」，呼籲各位積極支持捐血、捐骨髓、捐器官。

引夏寶龍 話大家應做「貢獻者」

盧寵茂呼籲捐血時話，人體係不斷製造血液，叫大家唔使擔心捐血之後會冇血，而健康人嘅身體有好多「財富」，應該捐出嚟。佢又話港人係年紀愈大，捐血比例愈高，16至30歲群組佔整體捐血人數19%，41至50歲群組佔咗整體捐血人數29%，在座議員大都係呢個群組。

局長仲提到無綫綜藝節目《中年好聲音》，讚中年人特別血氣旺盛，能夠付出自己去捐血，呼籲年輕人更積極捐血，無理由年輕人及不上中年人。佢話好多病人等待器官同骨髓配對，愈多人登記，成功配對嘅機會愈大；現時香港嘅中央器官捐贈登記名冊有38萬人登記，雖然創歷史新高，但佔成年人總人口不到10%，有好大改進空間。