【明報專訊】立法會食物安全及環境衛生事務委員會噚日開會，由環境及生態局介紹《施政報告》嘅政策措施，多名議員關注鼠患，其中飲食界張宇人提出，希望當局容許業界喺店舖養貓，「拉閘之後擺隻貓出嚟，幾細隻貓都可以捉到大隻嘅老鼠」，仲建議食環署喺轄下街市用同一方法滅鼠𠻹！

唔少議員亦關注食環署夜間防治鼠患流動隊嘅人手、資源同運作。食環署副署長姚繼卓話，各區現共有61隊夜間防治隊，每隊3人，全部係外判職員，當局會視乎鼠患情况、日間人手等調節隊伍數目及人數。

「無鼠百分比」難明 議員促復分級制

對於署方近年轉用熱能探測攝錄機配以人工智能技術做「鼠隻活動調查」，選委界陳凱欣認為，市民對調查所得嘅「無鼠百分比」難以理解，希望當局用番以前嘅「分級制」，畀大眾更清楚知道唔同區嘅鼠患情况。署理環境及生態局長黃淑嫻話𠵱家只有一期數據，儲夠更多數據就會考慮分級。