【明報專訊】非牟利組織曙光計劃前日喺facebook上載4張求助者屋企嘅相，話係社工轉介嘅緊急個案，形容係「家徒四壁」。相片所見，成間屋無乜家俬，兩個細路瞓地板，呼籲大家捐款同二手家俬。不過，有網友質疑個單位唔止光猛寬敞，地板仲識「反光」似用靚料，屋企又有大批香薰精油，留言「係豪宅級嘅家徒四壁」、「個地板仲貴過我屋企啲家俬」，鬧爆個計劃「好失敗」。

一家四口 事主術後失工作能力

根據帖文描述，求助人舊年做手術後喪失工作能力，老婆有抑鬱症，一家四口住公屋。曙光計劃主席何峻維噚日同Emily話「好無奈」，「無諗過幫人要畀人鬧」。佢解釋，「家徒四壁」係由社工轉述，單位入面的確無家俬，「呢個形容都好合理」，又話事前唔知個案有精油套裝。

對於有網民質疑計劃無完善審查機制，擔心捐款用錯地方，何峻維話「好相信社工嘅專業」，所以轉介得嘅多數都會幫，就算同事上門度尺時，都唔會多問求助者情况，怕多口會激起佢哋情緒，又話社工有指引，唔建議佢哋多問。

何峻維話經過呢件事之後，個計劃仍會繼續，求助者一蚊都唔使畀，𠵱家已經幫個案搵到部分家俬。佢話「清者自清」，希望網民「了解多啲先」。