【明報專訊】去旅行掃貨固然開心，但要拖住大大件行李由機場往返屋企唔係咁易，香港快運（HKExpress）近日同順豐香港合作，推出機場行李送遞服務九折優惠，首件行李原價180元，之後每件120元，九折後分別係162元同108元。

無論係出發去機場定由機場返屋企，都可以搵順豐託運行李，市民出發前可以預約順豐上門收件，去到機場後，喺5樓嘅行李寄存及送遞服務櫃枱攞行李，再做登機手續，落機後亦可以去同一櫃枱託運行李返屋企。據順豐網頁，每件行李唔可以超過航空公司最重限額，以快運嚟講，上限係30公斤，尺寸總長度（長+闊+高）唔可以超過199厘米。

不過要留意截單時間，只有下午5點或之前上門收件先可以即日送到機場，否則可能翌日先送到。喺機場託運行李返屋企，亦要喺下午3時半前到櫃位辦完手續，否則唔可以即日派送，要翌日朝早7點半後先會送件，而且要收每個鐘14元嘅額外寄存費。