【明報專訊】Emily喺9月底報道過，環境及生態局長聯同國家生態環境部宣傳教育中心製作咗《遇見美麗中國》和《美麗香港》系列專題片，介紹內地及香港生態環境，例如香港嘅美麗海灣同珊瑚。不過，可能唔係好多人知道有啲咁靚嘅短片睇，喺環境及生態局YouTube頻道，美麗香港海灣短片推出逾一個月，頻道內只有1600次收看，頻道內嘅遇見美麗中國嘅影片，收看率仲低啲。不過，大家以後如果去立法會，就可以喺大樓內嘅LED大屏幕睇到有關短片，因為由噚日起，大屏幕會盡量循環播放呢批專題短片。

上載YouTube逾月 海灣短片1600次收看

立法會噚日就安排一眾議員喺大樓觀看短片。立法會主席梁君彥話，世界級桌球大師奧蘇利雲決定移民香港，其中一個重要原因都係話被香港嘅自然美景吸引。梁主席話，國家及香港有好多自然生態，值得大家多發掘、珍惜。

佢又話，立法會非常支持政府和各界人士多同內地當局合作，善用嶄新科技，製作更多高質量專題片，說好國家和香港自然生態故事。