【明報專訊】半夜肚餓想食宵夜唔知可以去邊？旅發局近日同內地應用程式「高德地圖」合作推廣夜經濟，即日起推出「香港宵夜地圖」，喺高德地圖App入面搜尋「香港宵夜」，會見到一個名為「香港」、以旅發局標誌為頭像嘅帳號，關注帳號後就可以搵到4篇唔同主題嘅「宵夜指南」，包括「夜貓子必去的國際美食」、「深夜甜品店推薦」、「深夜火鍋文化」同「熱鬧非凡的深夜美食之旅」，當中有介紹串燒店、打冷店、夜茶等。另外亦有一篇「香港最具性價比的餐飲體驗」，由酒店自助餐、私房菜，到連鎖餐廳都有介紹。

Emily睇過，呢5篇指南介紹咗超過50間本地餐廳，全部都喺港島同九龍，每間都附有地址鏈結，撳入去可以直接喺App叫埋的士去。喺App入面叫的士都有優惠，只要搜尋「香港游」，就可以領取總值最高180元嘅優惠券，其中首次叫車嘅乘客可領取61元減免優惠，現有用戶領券後最高亦可減30元。