【明報專訊】教育局前局長「孫公」孫明揚日前逝世，終年80歲。前財政司長曾俊華噚日喺facebook發文悼念，憶述自己加入政府十幾年後，去到新嘅房屋及規劃地政局先有機會同孫公共事，仲「幾乎每個星期都會見面」，話只係做咗一年就體會到孫公「拆彈專家」嘅稱號。曾俊華話，孫公令佢更加敬重嘅係為人正義，非常有誠信。

曾俊華又提到，冇做官之後，坐公共交通工具時耐唔耐都會有市民走埋嚟問佢係唔係孫明揚，佢講笑話有可能佢同孫公「都係同屬二撇雞之故喇」。不過，曾俊華話唔會刻意澄清，大多數都係笑笑口回應「早晨」或者「你好」，佢認為由此可見，唔少市民都好熟悉孫公，亦相信孫公喺大多數市民眼中係一個好官嚟，所以佢覺得被誤會為孫公「對我嚟講，都係一種榮譽嚟嘅」。