【明報專訊】唔少人食西多士同麵包必定加牛油，去快餐店嗌多士都會有牛油跟餐附送。近日網上熱議大家樂嘅跟餐牛油，轉用咗一款名為「Treasure 維寶」嘅「Slightly Salted Spreadable」（圖），包裝唔見「butter（牛油）」字樣，上網亦搵唔到相關資料，引起網民猜測。Emily噚日試食過呢款「牛油」，口感同牛油差唔多，聞落就有啲膠味。大家樂集團同Emily解畫，話主要成分係優質植物油同牛油，產地係荷蘭。

綜合網民所講，網上並冇呢款產品嘅任何資料，佢個包裝上印有「Slightly Salted Spreadable（有鹽塗抹醬）」、「270mg OMEGA-3（奧米加3脂肪酸）」嘅字樣，其他成分就無喺包裝上標示，難怪唔少人質疑呢款產品係唔係真嘅牛油同埋佢嘅來源地。

大家樂集團回覆查詢時話，佢哋一向重視食物品質同安全，由採購到製作都有嚴謹政策同指引，確保食材同製成品符合安全同質素要求；佢哋話大家樂快餐近日新選用嘅「軟質牛油醬」，源頭採購同生產係荷蘭嘅自家品牌產品，以優質植物油同牛油為主要成分，加入咗奧米加3脂肪酸。