【明報專訊】香港有「茶記」衝出國際。Emily講緊嘅係旅發局上周三（16日）起一連五日喺巴黎大皇宮開設茶餐廳，訪客可以喺茶記內品嘗叉燒飯、菠蘿包、蛋撻、芒果布甸和港式奶茶等多款地道美食。旅發局話，會喺巴塞爾藝術展12月初舉行嘅邁阿密海灘展呈現香港特色體驗。據了解，巴黎大皇宮嘅茶記到時會「飛去」美國邁阿密。

有叉燒飯菠蘿包奶茶等

旅發局早前喺巴塞爾藝術展巴黎展會上，啟動與巴塞爾藝術展3年全球伙伴合作計劃首個項目，喺巴黎大皇宮「開設茶餐廳」，畀各地訪客體驗香港文化，訪客並可以欣賞出自藝術家楊沛鏗「混亂太陽群」系列嘅燈光裝置藝術作品，作品曾於今年第24屆悉尼雙年展中展出。旅發局期望，透過藝術同美食結合，加深國際藝術文化愛好者對香港生活文化認識及熱愛。睇番茶記內嘅特色手寫餐牌，最代表茶記文化嘅熱奶茶賣緊6歐元一杯，折合約50港元。

旅發局總幹事程鼎一話，睇到茶餐廳喺展會大受歡迎，唔少訪客親臨品嘗香港地道美食，令人鼓舞，期待未來喺巴塞爾全球嘅展覽繼續以不同方式呈現香港特色體驗，展現香港作為國際文化交流中心嘅地位，並希望更多參與展覽嘅藝術愛好者能夠訪港，親身體驗香港文化。