【明報專訊】律政司長林定國噚日晨咁早返母校港大，出席法律學院搞畀法律執業者嘅講座。林一開始就話自己既興奮又緊張，因為自畢業以來第一次返港大講課。唔講唔知，港大法律學院嘅執業者講座，早喺1974年開始舉辦。

林定國講課以香港同內地民商事司法互助為題，回顧兩地喺民商事判決同仲裁方面司法互助或合作，講咗大約45分鐘。佢話香港喺一國兩制下實行普通法，同內地法制完全唔同，但咁唔代表兩種法制無聯繫，反而為咗香港同國家利益，兩種法制應有恰當嘅聯繫。現場有傳媒喺度，司長演說後無「學生」舉手發問。

聽課業界無人舉手發問

林完課時話，希望自己講得可以，下次再返嚟講書。佢同出席講座嘅高院退休法官包華禮（Mohan Bharwaney）並肩離開時講笑咁話，如果早知包官會嚟聽，自己就唔嚟教喇，亦都好開心可以見番包官。