【明報專訊】網上資訊唔一定真，港大早前就喺facebook同Ig官方帳號各上載一張陽光照射百周年校園嘅相片，話係「晨曦的第一束光」，不過事隔一個星期，就畀港大嘅事實查核中心annie lab發現「晨曦」嘅說法係「MISLEADING（誤導）」，因為根據照片拍攝嘅方向同景物，太陽光係來自西面，所以其實係日落而唔係日出，事件引起網民熱議。

上載7日被糾錯 刪帖重發致歉

annie lab係由港大新聞及傳媒研究中心與Asian Network of News & Information Educators（ANNIE）合作成立，2022年成為國際事實查核聯盟認證成員。annie lab備份咗出錯原帖嘅網頁，顯示原帖喺今個月7號發出，annie lab喺事隔7日後發現錯誤。

睇番港大嘅facebook同Ig，有錯嘅帖已刪，噚日下晝港大重新發帖，同一相配上更新後嘅文字：「秋陽和煦，擁抱校園的夕陽之光。」港大又喺下方留言以中英文致歉：「配文已更正，我們表示歉意並感謝讀者朋友指出錯誤。」Emily覺得，錯而能改嘅態度好值得學習。