【明報專訊】政府噚日刊憲，將堅尼地城嘅魯班先師廟，同埋錦田嘅鄧伯裘故居列為法定古蹟。睇番香港魯班廣悅堂嘅網頁介紹，魯班先師廟係兩進一天井一開間佈局，兩進側面嘅梯級形山牆被稱為「五岳朝天」，喺香港罕見。魯班廟早喺2009年12月獲評為一級歷史建築，今年慶祝建基140周年，可謂好事成雙。連同上述兩項，香港𠵱家有136項法定古蹟。

魯班廟梯級形山牆罕見 鄧故居糅合中西

魯班先師廟係全港唯一供奉春秋時期著名工匠魯班嘅古廟，始建於1884年，1928年原址重建，本地建造界每年魯班誕都會去廟內拜祭，形成獨特嘅文化傳統。魯班廟內外有手工精細嘅壁畫、灰塑、木雕同陶塑裝飾，當中屋脊嘅陶塑由石灣著名花脊店均玉店燒製。廟宇另一個建築特色係呈梯級形嘅山牆，外形好似刀尖向上嘅匕首。

至於鄧伯裘故居建於二十世紀初，見證錦田發展。1876年出生嘅商人鄧伯裘係錦田鄧族顯赫人物，對錦田、元朗以至新界嘅發展貢獻良多，尤其係教育同醫療方面，佢曾經喺故居為鄧族子弟開私塾。佢嘅故居係單層長方形青磚建築，附3層高更樓，建築結構同室內裝修融合中西元素，大部分原有建築構件、飾面同裝飾都有保存落嚟。