【明報專訊】仲有大概3個星期就到萬聖節，旅發局將推出一系列節目，包括下星期五（18日）至31日每晚8點15分至10點半，將太空館變成光影動感南瓜、白色幽靈、菠蘿包、銀河同蝙蝠等萬聖節造型，配埋音樂，希望將太空館打造成打卡點，到時仲會有不定時嘅快閃街頭表演，希望為大家帶嚟歡樂。

發光電車穿梭港島 嘩鬼萬聖夜巡遊

另外今個星期五（11日）起，旅發局特設「哈囉威香港」發光主題電車穿梭港島，根據模擬圖片，紫色嘅電車會貼上發光嘅南瓜等萬聖節裝飾。

到咗10月31日萬聖夜，旅發局會舉辦主題電車巡遊表演，有好多「鬼怪」喺車上沿途同大家見面；而特別版嘅「雪糕南瓜車」就會喺下星期五（18日）起連續兩個周五周六，限定喺銅鑼灣、尖沙嘴同旺角出現派免費雪糕，萬聖夜就會停喺中環8號碼頭。