【明報專訊】香港正開拓中東市場，新民黨立法會議員容海恩（Eunice）上月聯同一間內地企業出訪科威特，佢噚日話當地需要法律、融資等人才，仲有溫室耕作等技術，相信香港可發掘投資機會，但就要加強阿拉伯語教育。

話當地唔抗拒注資北都人工島

Eunice話科威特營商環境友善，近年已放寬外資限制，例如可以設立外資全資公司，認為香港商界可以開拓當地商機，但語言係一大障礙。佢喺行程中亦趁機介紹香港將發展北部都會區同埋交椅洲人工島，邀請當地基金投資香港，引述對方唔抗拒，仲點名希望與負責財金嘅官員洽談。佢話稍後會向政府反映，爭取當局出訪科威特。

Eunice此行亦出席咗一個當地婚禮，男家同女家婚宴分開舉行，雙方唔會碰面，當地食飯時男女好多時會分開坐，形容當地風土人情跟香港非常唔同。

除咗遠赴中東，Eunice國慶前夕被網民影到同家人去日本旅行。對於旅行時被偷拍，佢大方咁話成日都有人影佢，「唔緊要，我哋好開放，唔介意」。佢憶述當時無注意有人舉機拍攝，事後都無留意網民討論。