【明報專訊】電影《九龍城寨之圍城》賣座，九龍西潮人聯會亦想食住條水，舉辦活動畀多啲人認識九龍城。聯會喺嚟緊嘅周六同周日（12及13日）喺賈炳達道公園球場舉行「潮玩夜市2.0」，有飲有食有表演，仲邀請咗《九龍城寨》小說作者余兒係周六下午4點半到場同讀者簽名。

九龍寨城原址搞 有潮汕美食文化表演

聯會會長陳欣耀話，活動場地係真真正正當年九龍寨城嘅位置，而夜市有20幾個攤檔，售賣各類潮汕美食，例如鹵水鴨、潮州肉丸、油甘子、功夫茶等，亦會有潮州文化表演。佢話兩日活動各預先派票5000張，另每日額外有1500張即場派。雖然話係夜市，但活動到最遲晚上9點就要停，陳話佢哋響應政府夜繽紛呼籲，想開夜啲，但康文署場地有限制，怕噪音騷擾附近居民。立法會九龍中議員楊永杰就話市民去夜市可以帶動鄰近人流，提升本土經濟。

呢個夜市喺周六開下晝4點至夜晚9點，周日就由上晝11點至夜晚8點。