【明報專訊】面對生活壓力，人人有自己嘅減壓方式。民政及青年事務局長麥美娟接受恒生大學《恒傳感言》訪問時就分享佢會食自助餐減壓，話見到成枱食物就好開心。「食嘢對我係一個最大嘅（紓壓）方法，人哋一日一個蘋果，我就一日一包薯片。」

籲勿視青年不婚為問題

麥美娟喺訪問中被問到點樣減壓，就話自己好鍾意食自助餐，特別係熱葷同雪糕，上任兩年幾已經食咗好多餐自助餐，「我就唔知點解個個見到我，就話我做完（局長）之後覺得我瘦咗，實際上我係肥咗」。做過10年立法會議員嘅麥美娟提到𠵱家每次去立法會開會，投票時經常習慣想舉手，要提醒自己係官員而非議員。佢認為從政經驗令佢了解議員想聽到咩答案，同事都讚佢似係去立法會傾偈。

咁啱醫衛局噚日喺社交平台，鼓勵夫婦規劃及早孕育下一代。但根據政府數字，現時25至39歲適婚青年只有約四成已婚，對於係咪反映青年對未來無信心，單身嘅麥美娟認為遲婚、不婚係全球趨勢，但希望社會唔好視青年唔結婚為問題，「咁樣畀青年好大壓力，其實呢個都係佢哋生活上嘅選擇」，相信各人有不同考慮。