【明報專訊】中大近年風波不斷，校長段崇智同校董會屢鬧紛爭，而最近換校徽項目餘款下落被質疑，引發段崇智同中大出稿反駁，校董會主席查逸超則指示中大將反駁聲明下架。查逸超同段崇智噚日罕有同場現身，出席中大創新創業展開幕禮，佢哋喺觀展期間企到離行離迾，無傾偈，至啟動儀式結束，台上4個主禮嘉賓互相握手問好，查段兩人先至隔遠揮手示意，再喺財政司長陳茂波嘅背後握手。不過，佢哋落咗台後就再無交流。