【明報專訊】西甲球隊馬德里體育會訪港，噚晚同本地勁旅傑志較量。立法會議員林振昇噚日就喺社交媒體上載手持馬體會波衫嘅相，話自己係「真.馬體會」球迷。西甲球壇一直由皇家馬德里及巴塞隆拿雄霸，但馬體會能夠突圍，仲喺2014年奪得西甲冠軍，林振昇話佢就喺當年買咗手上呢件馬體會波衫，多年來都支持呢隊波。不過，佢同Emily講由於一早有工作安排，噚日無緣入場支持，有少少可惜。工聯會陸頌雄就三代同堂去咗大球場觀賽，表現興奮。