【明報專訊】前日升中派位放榜，油蔴地天主教小學（海泓道）3個小六生受訪片段喺網上熱傳，唔少人話小朋友有童真、好惹笑。校長陳淑儀（圖）噚日於電台解畫，話3名同學雖屬好友，但平時唔會特別傾讀書心得；當聞言好友陳同學星期一至五放學後即去補習時，旁邊嘅江同學「O嘴」，純粹係覺得陳同學好犀利，「哇，咁辛苦？」；另一好友許同學聽到陳同學受訪時打眼色只係提醒江同學，「人哋做緊訪問，唔好喐嚟喐去啦」。校長起初都擔心網上個別言論會影響學生心情，好彩3人事後都話「好OK、冇嘢喎」，希望網民留言時多顧慮小朋友感受。