【明報專訊】政府打算喺中環海濱活動空間興建約13米高嘅港鐵通風樓，預計下年開始動工，為期7年。現時海濱會搞演唱會同活動，民建聯立法會議員陳學鋒就認為，中環海濱有獨特優勢，例如睇到維港美景，質疑通風樓係咪要「篤眼篤鼻咁樣，成支戙咗喺個海濱長廊」，問相關部門有無考慮過將通風樓「瞓低佢」，甚至「擺喺地底」。運輸及物流局副局長廖振新就回應話，「通風樓顧名思義就係要通風」，目的係要接駁地底隧道去地面通風，如果可以喺地底通風，就唔使提出起通風樓，認為呢項建議唔太實際。