【明報專訊】旅發局噚日公布訪港旅客最新數字，上個月（5月）初步約有340萬人次旅客訪港，按年升咗20%，頭5個月嘅訪港旅客就有約1800萬人次，按年多咗78%（舊年2月頭香港同內地先至全面恢復通關）。旅客來源地方面，頭5個月嘅訪港旅客當中有近1400萬人次來自內地，佔整體超過75%，非內地旅客就約有420萬人次，佔23%左右，但計升幅，非內地旅客就較大，按年升93.5%，內地旅客就升73.5%。