【明報專訊】立法會議員田北辰嘅組織實政圓桌，幾經辛苦先保到一人出戰區議會選舉，連日來田二少都係一人樂隊，隻身幫助出選屯門西嘅莊豪鋒企街站，唔似大黨候選人咁有好多重量級人物支持。不過，田二少噚日喺屯門蔡意橋擺街站時，有一位德高望重嘅人物現身，就係港大法律學系教授、基本法委員會前委員陳弘毅。田二少形容陳弘毅獻出兩個「第一次」，即第一次撐區選候選人、第一次落街站嗌咪，仲向街坊解說新選制。