【明報專訊】港燈為應對突發停電，現時會利用流動柴油發電機提供緊急臨時供電，以解市民之急，但柴油機缺點係會產生黑煙同製造噪音。港燈最近就引入咗一對「環保流動供電孖寶」，包括一個流動電池儲能櫃同一個流動電源切換裝置，分別搭載喺車上周圍去，為緊急事故同大型活動提供多一個零排放嘅後備電力供應方案。港燈計劃年尾喺中環海濱舉行嘅「FIA世界場地越野車錦標賽」上首次應用呢套系統。