【明報專訊】專門收留流浪同受傷毛孩嘅粉嶺狗場「傻媽流浪貓狗之家」，上年業主因家族土地糾紛，場內近百隻狗要搬走，好彩得到有心人幫手搵到上水恐龍坑嘅「新居」，噚日就有45隻毛孩新居入伙。上年已經幫助傻媽嘅立法會議員劉國勳噚日喺facebook出post話，見證一年嘅搬遷過程好感動，透露下周會有另一批毛孩搬入約3萬平方呎嘅新居。