【明報專訊】仲有個幾月就放暑假，唔少家長都會為仔女提早安排暑假時帶佢哋去邊度玩、參加咩課外活動等，「課外活動節暨教材及用品博覽2023」噚日起一連3日喺灣仔會展舉行，今年場內有超過200個攤位，提供文化藝術、音樂、運動、科學等各類課外活動，畀參觀者即場試玩。今年仲特別搞咗個「侏羅紀草原」園區，展示唔同種類嘅機動恐龍模型，噚日就有一班小朋友圍住隻像真度超高嘅「三角龍」， 一齊體驗「餵」恐龍食草。