【明報專訊】香港人口約730萬，當中有100多萬潮州人。香港潮屬社團總會今個月22日起，一連5日喺會展搞「香港潮州節」，全場有130多個攤位，介紹潮州食物、文化表演、工藝品等，活動籌委會副主席（執行）莊學海同Emily講，上次搞潮州節已經係2017年，當時喺遮打花園搞，只有十幾個攤檔；今次場地大咗、攤位多咗，可以加更多環節，除咗「一蚊魚蛋」等優惠外，現場仲有「雲旅遊」，畀暫時無得去旅行嘅香港人，實時透過當地「導遊」帶佢哋遊潮汕。常務會董兼總統籌胡炎松話，活動收10蚊入場費，但入場者可獲10蚊現金券喺現場用，所以算係免費入場。